Nga Kristjan Pashollari25 Mar 2022 7.3k
Rajoni

"Duam të drejtat tona", Serbët protestojnë në Kosovë

Serbët e Kosovës kanë protestuar sot në Graçanicë dhe në Mitrovicë të Veriut kundër vendimit nga Qeveria e Kosovës për moslejimin e mbajtjes së zgjedhjeve presidenciale dhe parlamentare të Serbisë më 3 prill edhe në komunat veriore të Kosovës, ku ka shumicë të banorëve serbë.

Mijëra protestues në qendër të Graçanicës kanë mbajtur parulla si “Duam të drejtat tona”, “Me paqe kundër dhunës së Kurtit”, “Kurti nuk do t’i dëbojë serbët nga Kosova dhe Metohia”, “Nuk dorëzohemi”.

Nënkryetari i Listës Serbe, njëherësh kryetar i Komunës së Shtërpcës, Dalibor Jevtiq tha në Graçanicë se mesazhi kryesor i protestës ishte "të ndalet dhuna institucionale ndaj serbëve".

“Të gjithë prokurorët dhe gjyqtarët serbë sot në mëngjes kanë dalë nga zyrat e tyre pas suspendimit të kryetarit të Gjykatës Themelore në Mitrovicë dhe të gjithë përfaqësuesit politikë serbë po e ndërpresin punën e tyre me një mesazh të qartë se të drejtat tona duhet të respektohen dhe se dhuna institucionale ndaj nesh duhet të përfundojë”, tha Jevtiq.

Ai theksoi se përgjegjësinë për moslejmin e zhvillimit të zgjedhjeve serbe në Kosovë e kanë pushtetarët në Prishtinë dhe përfaqësuesit e bashkësisë ndërkombëtare.

“Qëllimi ynë është të luftojmë në mënyrë demokratike dhe përgjegjësinë e kanë të gjithë ata që sot e përbëjnë pushtetin në Prishtinë, si dhe përfaqësuesit e bashkësisë ndërkombëtare nga e cila kërkojmë mbrojtje institucionale”, tha Jevtiq.

Në të njëjtën kohë, Goran Rakiq, kryetari i Listës Serbe, e cila është parti parlamentare në Kuvendin e Kosovës, nga protesta në Mitrovicë të Veriut tha se Lista Serbe dhe stafi serb në Gjyqësorin e Kosovës e kanë pezulluar punën në institucionet e Kosovës derisa të kthehet në postin e saj Liliana Stevanoviq, kryetare e Gjykatës Themelore të Mitrovicës.

- Qeveria e Kosovës nuk pranon të mbahen zgjedhjet e Serbisë në Kosovë pa një marrëveshje me Qeverinë e Serbisë

Zgjedhjet presidenciale dhe parlamentare në Serbi janë caktuar të mbahen më 3 prill.

Me t’u kuptuar nga udhëheqësit serbë se zgjedhjet nuk do të mund të mbahen në territorin e Kosovës pa një marrëveshje paraprake me Qeverinë e Kosovës, më 22 mars u zhvillua takimi i disa udhëheqësve të institucioneve dhe zyrtarëve policorë nga komunat veriore kosovare me presidentin Aleksandar Vuçiç, në Beograd.

Për shkak të këtij takimi, të enjten Këshilli Gjyqësor i Kosovës suspendoi nga puna gjyqtaren e minoritetit serb nga Kosova, Liljana Stevanoviq e cila mbanë postin e kryetares së Gjykatës Themelore të Mitrovicës.

Pas këtij vendimi, presidenti i Serbisë, Vuçiç, doli me një video-mesazh, siç e ka quajtur ai urgjente, ku thotë se me vendimin e tij kryeministri Kurti synon të sulmojë serbët kudo që janë, “por, çka do që të bëni, Serbia është me popullin e saj”.

Në këtë mbledhje përpos gjyqtares së suspenduar, morën pjesë edhe një ministër i Qeverisë Kurti, disa deputetë serbë të Kuvendit të Kosovës dhe zyrtarë të tjerë serbë të institucioneve të Kosovës.

Komuniteti ndërkombëtar i ka bërë vazhdimisht thirrje Qeverisë së Kosovës që të gjejë mënyra për mbajtjen e zgjedhjeve serbe.

Zgjedhjet e fundit parlamentare, që Serbia i ka organizuar edhe për komunitetin serb në Kosovë, kanë qenë ato të 21 qershorit 2020 të mbajtura sipas një praktike të mëhershme, ku misioni në Kosovë i Organizatës për Siguri dhe Bashkëpunim në Evropë i ka grumbulluar votat. Ato vota më pas janë numëruar në Rashkë dhe Vranjë, dy qytete kufitare të Serbisë. Kjo praktikë ishte krijuar qysh në vitin 2017 dhe autoritetet e Kosovës e kishin lejuar një gjë të tillë.