Sarajevë – Këshilli i Myftive të Bashkësisë Islame në Bosnje dhe Hercegovinë ka reaguar lidhur me njoftimin për krijimin e një Shteti të Urdhrit Bektashian në Shqipëri. Në sesionin e tij të 43-të të rregullt, të mbajtur më 13 dhjetor 2024 në Sarajevë, ky organ ka diskutuar mbi çështjen dhe ka shprehur shqetësimin e tij për pasojat e mundshme të këtij zhvillimi.
Në deklaratën e publikuar pas takimit, Këshilli i Myftive e konsideron këtë një eksperiment shoqëror me implikime të panjohura, që rrezikon të cenojë marrëdhëniet mes bashkësive tradicionale myslimane dhe komuniteteve të tjera fetare në Ballkan.
Sipas Këshillit, kuadri ligjor ekzistues në vendet e Ballkanit, si dhe në Bashkimin Evropian, ku aspirojnë të anëtarësohen këto vende, ofron kushte të mjaftueshme për organizimin e jetës fetare të të gjitha bashkësive, përfshirë dhe atë Bektashiane.
Këshilli e sheh këtë hap si një precedent të rrezikshëm për politizimin e identitetit fetar dhe futjen e modeleve të organizimit fetar institucional që janë të huaja për rajonin e Ballkanit.
Deklarata përfundon duke bërë thirrje për respektimin e harmonisë ndërfetare dhe rregullave ekzistuese, duke theksuar rëndësinë e ruajtjes së stabilitetit dhe bashkëjetesës në këtë pjesë të Evropës.
