Izraeli ndalon anëtarin e Parlamentit Evropian të vizitojë Palestinën

Eurodeputeti i së majtës së Bashkuar, Manuel Pineda, akuzon Izraelin për “bllokim të punës së Parlamentit Evropian”

Izraeli nuk e ka lejuar të hyjë në vend Manuel Pineda-n, politikani komunist spanjoll nga koalicioni e Majta e Bashkuar, i cili është anëtar i Parlamentit Evropian (PE) dhe gjithashtu kreu i delegacionit për marrëdhëniet BE-Palestinë.

Ai ndau gjithashtu deklaratën e refuzimit të lëshuar nga Ministria e Jashtme izraelite.

Sipas “informacioneve të marra nga autoritetet kompetente në Izrael”, ministria ka vendosur “të mos miratojë ardhjen” e eurodeputetit Pineda në vend, thuhet në deklaratë, pa dhënë arsye.

Pineda akuzoi Izraelin për “bllokim të punës së Parlamentit Evropian”.

“Gjatë misionit ishin planifikuar takime me autoritetet palestineze dhe shoqërinë civile, për të parë pasojat e pushtimit në jetën e përditshme të popullsisë palestineze në territor, si dhe për të parë efektet e politikave të bashkëpunimit të BE-së”, tha Pineda.

Presidentja e Parlamentit Evropian, Roberta Metsola, shprehu gjithashtu keqardhje për vendimin e refuzimit të hyrjes së Pineda-s në Izrael.

“Unë do ta ngre këtë çështje menjëherë me autoritetet përkatëse. Respekti për eurodeputetët dhe Parlamentin Evropian është thelbësor për marrëdhënie të mira”, shkroi Metsola në Twitter.