Arabia Saudite dhe Katari do të shlyejnë borxhet e papaguara të Sirisë, në vlerë rreth 15 milionë dollarë, ndaj Grupit të Bankës Botërore, thuhet në një deklaratë të përbashkët të dy vendeve – duke hapur kështu rrugën për miratimin e miliona dollarëve në grante për rikonstruksion dhe për mbështetjen e sektorit publik të paralizuar të vendit, raporton Reuters.
Reuters ishte i pari që raportoi këtë zhvillim më herët gjatë këtij muaji. Kjo do të jetë hera e parë që Arabia Saudite ofron financim për Sirinë që nga rrëzimi i udhëheqësit të mëparshëm, Bashar al-Asad, nga rebelët e udhëhequr nga islamistët, vitin e kaluar.
Ky veprim shihet edhe si një sinjal i parë konkret i përfshirjes së shteteve të Gjirit në rindërtimin e Sirisë, pasi përpjekjet e mëparshme – përfshirë një nismë nga Katari për të financuar pagat e punonjësve publikë – ishin bllokuar për shkak të pasigurisë rreth sanksioneve të Shteteve të Bashkuara.
“Ky angazhim do të hapë rrugën për Grupin e Bankës Botërore që të rifillojë mbështetjen dhe operacionet në Siri, pas një pezullimi që ka zgjatur më shumë se katërmbëdhjetë vjet,” thuhet në deklaratën e përbashkët të Riadit dhe Dohës.
“Gjithashtu, do t’i mundësojë Sirisë qasjen ndaj mbështetjes financiare në afat të afërt për zhvillimin e sektorëve kritikë.”
Të dy vendet u bënë thirrje gjithashtu institucioneve financiare ndërkombëtare dhe rajonale që të rifillojnë dhe të zgjerojnë sa më shpejt angazhimin e tyre për zhvillim në Siri.
Siria ka aktualisht rreth 15 milionë dollarë borxhe të papaguara ndaj Bankës Botërore, të cilat duhet të shlyhen që kjo e fundit të mund të miratojë grante dhe ndihma të tjera financiare.
