Starbucks raportoi të mërkurën se shitjet e saj globale ranë me shtatë për qind në periudhën korrik-shtator të këtij viti, duke shënuar tremujorin e tretë radhazi të rënies, sipas raportit të Anadolu. Shitjet e krahasueshme globale të dyqaneve të kompanisë ranë me shtatë për qind për vitin fiskal që përfundoi më 29 shtator.
Fitimet për aksion ranë me 25 për qind krahasuar me të njëjtën periudhë të vitit të kaluar, duke zbritur në 80 centë. Të ardhurat neto të konsoliduara të kompanisë ranë me tre për qind, duke arritur në 9.1 miliardë dollarë.
Drejtori i ri Ekzekutiv, Brian Niccol, tha se Starbucks ka nevojë për një "ndryshim themelor" pasi pezulloi parashikimin e saj vjetor për vitin e ardhshëm fiskal. "Performanca më e ulët se sa pritej për gjithë vitin fiskal ishte rezultat i rënies së trafikut, përfshirë një mjedis konsumatorësh të kujdesshëm, dhe investimeve të synuara dhe të përshpejtuara që nuk përmirësuan sjelljet e klientëve, si dhe presionet nga mjedisi makroekonomik dhe konkurrues në Kinë," thuhet në një deklaratë për shtyp të Starbucks.
Shefja e Financave, Rachel Ruggeri, tha se pavarësisht rritjes së investimeve në zinxhirin e kafesë, nuk u pa ndonjë ndryshim i dukshëm në trafikun në rënie, pavarësisht përpjekjeve për efikasitet, edhe pse ekzekutivët kanë një plan për të ringjallur biznesin në afat të gjatë.
Starbucks është përballur me protesta dhe fushata bojkoti në të gjithë botën për mbështetjen e saj ndaj Izraelit. Efektet e tyre pasqyrohen në rezultatet financiare të kompanisë për tre tremujorët e fundit. Zinxhiri i kafesë uli parashikimin e shitjeve vjetore për tetor-dhjetor vitin e kaluar për shkak të ndikimit negativ në shitjet në Lindjen e Mesme, ndërsa të ardhurat e saj ranë me dy për qind në janar-mars dhe shitjet globale ranë me katër për qind, një rënie e parë që nga fundi i vitit 2020. Shitjet globale ranë me tre për qind në prill-qershor./bota-islame.com
