Turqia po normalizon marrëdhëniet me Sirinë në kuadër të një periudhe të re të hapur në politikën e jashtme. Si Presidenti i Turqisë, Recep Tayyip Erdoğan, ashtu edhe Presidenti i Sirisë, Bashar al-Assad, kanë dhënë mesazhe reciproke, duke sinjalizuar fillimin e dialogut mes dy vendeve.
Në këtë kontekst, Ministri i Jashtëm i Rusisë, Sergey Lavrov, ka folur për hapat e normalizimit të marrëdhënieve mes Turqisë dhe Sirisë. Në një intervistë për Russia Today (RT), Lavrov ka njoftuar se Rusia, Turqia, Siria dhe Irani planifikojnë të zhvillojnë një takim tjetër në të ardhmen e afërt për të diskutuar mbi normalizimin e marrëdhënieve mes Ankarasë dhe Damaskut.
Lavrov theksoi se vitin e kaluar janë bërë përpjekje të mëdha për të organizuar takime me pjesëmarrjen e ministrive të mbrojtjes dhe të jashtme, si dhe institucioneve të posaçme. Këto takime janë përdorur për të diskutuar kushtet që mund të çojnë në normalizimin e marrëdhënieve mes Sirisë dhe Turqisë, me përfaqësues nga Siria, Turqia, Rusia dhe Irani.
Ministri Lavrov po ashtu deklaroi se Turqia është e gatshme të diskutojë tërheqjen e trupave të saj nga Siria. Ai shtoi se megjithëse turqit janë të gatshëm për këtë hap, ende nuk janë arritur marrëveshje mbi parametra specifikë. Diskutimet përfshijnë kthimin e refugjatëve dhe masat e nevojshme për të neutralizuar kërcënimin e terrorizmit që do të bënte të panevojshme praninë e trupave turke. Lavrov vuri në dukje se sipas qeverisë siriane, një vendim i qartë për tërheqjen përfundimtare të trupave turke nga Siria është i nevojshëm për normalizimin e marrëdhënieve me Ankaranë./bota-islame.com
