Arabia Saudite cakton afatin e fundit për largimin e pelegrinëve të huaj të Umres

Arabia Saudite cakton 29 prillin si afatin e fundit për largimin e pelegrinëve të huaj të Umres

Ministria e Haxhit dhe Umres në Arabinë Saudite ka shpallur datën 29 prill si afatin përfundimtar për largimin e pelegrinëve të huaj që kanë kryer Umren, ndërsa Mbretëria po përgatitet për sezonin vjetor të Haxhit.

Sipas njoftimit zyrtar, dita e fundit për hyrjen e pelegrinëve të Umres në Arabinë Saudite është caktuar 13 prilli (15 Shawwal). Ministria paralajmëroi se qëndrimi përtej datës 29 prill do të përbëjë shkelje të rregullave të vizës dhe të rregulloreve të pelegrinazhit, me dënime që mund të arrijnë deri në 100,000 rijalë sauditë (rreth 24,000 euro).

Autoritetet kërkuan që të gjitha agjencitë shërbyese dhe institucionet sponsorizuese të sigurohen që pelegrinët të respektojnë afatin e largimit, duke theksuar se mosraportimi i shkeljeve mund të sjellë ndëshkime maksimale edhe për vetë ofruesit e shërbimeve.

Ndërprerja e pritjes së pelegrinëve ndërkombëtarë për Umre para fillimit të Haxhit është një praktikë standarde në Arabinë Saudite, me qëllim garantimin e sigurisë, menaxhimit efikas të turmave dhe organizimit të qetë të një prej ngjarjeve më të mëdha fetare në botë, që nis zyrtarisht më 1 Dhul Kade.