Sekretari amerikan i Shtetit, Antony Blinken, raportohet se ka njoftuar ministrat e jashtëm të vendeve të G7 se Irani dhe Hezbollahu mund të sulmojnë Izraelin brenda 24-48 orëve, sipas burimeve nga Anadolu.
Tre burime të njohura me bisedën telefonike, të cilët folën për uebfaqen amerikane Axios, kanë thënë se Blinken deklaroi se SHBA-ja beson se Irani dhe Hezbollahu do të hakmerren.
Në informimin e tij për ministrat e jashtëm të G7, Blinken theksoi se nuk është e qartë se si do të hakmerret Irani dhe se nuk dihet koha e saktë e sulmeve, por ato mund të ndodhin brenda 24-48 orëve të ardhshme.
Blinken theksoi përpjekjet e SHBA-së për të kufizuar sulmet e Iranit dhe Hezbollahut dhe për të ndërprerë ciklin e përshkallëzimit të tensioneve duke frenuar reagimin e Izraelit.
Ai bëri thirrje për presion diplomatik ndaj Iranit, Hezbollahut dhe Izraelit për të treguar përmbajtje dhe sqaroi se rritja e numrit të forcave amerikane në rajon është për qëllime mbrojtëse.
Një burim që mori pjesë në takim tha se Blinken "dukej i zhgënjyer" ndërsa informonte ministrat për bisedimet e fundit me Izraelin për të burgosurit në Gaza dhe marrëveshjen e armëpushimit.
Sipas një deklarate të Departamentit Amerikan të Shtetit, Blinken ka folur në telefon me ministrat e jashtëm të vendeve të G7 për të diskutuar nevojën urgjente për të ulur tensionet në Lindjen e Mesme.
Ministrat diskutuan përpjekjet për të arritur një armëpushim që do të sigurojë lirimin e pengjeve dhe dërgimin e ndihmave humanitare në Gaza. Ata gjithashtu diskutuan se si armëpushimi në Gaza mund të ndihmojë në arritjen e paqes dhe stabilitetit në rajon, përfshirë vijën kufitare midis Izraelit dhe Libanit, të quajtur "Vija Blu". Ministrat përsëritën angazhimin e tyre për sigurinë e Izraelit dhe bënë thirrje për përmbajtje maksimale nga të gjitha palët për të parandaluar përshkallëzimin e konfliktit.
