Guvernatori Bob Ferguson nënshkruan ligjin historik që njeh zyrtarisht festat e Fitër Bajramit dhe Kurban Bajramit
TACOMA — Guvernatori i shtetit të Washingtonit, Bob Ferguson, ka nënshkruar një ligj historik që njeh zyrtarisht festat myslimane Fitër Bajramin dhe Kurban Bajramin si festa shtetërore, duke e bërë Washingtonin shtetin e parë në SHBA që ndërmerr një hap të tillë. Ferguson e nënshkroi ligjin në një ceremoni të mbajtur në Qendrën Islame të Tacoma-s, përballë një salle të mbushur plot me pjesëmarrës.
Projektligji i Senatit nr. 5106, i sponsorizuar nga senatorja Yasmin Trudeau (Demokrate nga Tacoma), i shton të dy bajramet në listën e 20 festave të tjera shtetërore të njohura. Deputeti Osman Salahuddin (Demokrat nga Redmond) ishte sponsori i projektligjit përkatës në Dhomën e Ulët.
Fitër Bajrami dhe Kurban Bajrami janë ndër festat më të rëndësishme islame, të cilat festohen nga miliona njerëz në mbarë botën, përfshirë më shumë se 100,000 myslimanë që jetojnë në shtetin e Washingtonit.
Ligji i ri nuk i shpall këto festa si ditë pushimi me pagesë, por i shton ato në listën e festimeve të njohura nga shteti, në të njëjtën mënyrë si Viti i Ri Hënor apo Dita e Billy Frank Jr.
“Ky ligj nuk ka të bëjë vetëm me zgjerimin e listës së festave shtetërore,” tha guvernatori Ferguson.
“Njohja e bajrameve tregon për miqtë, familjet dhe fqinjët tanë myslimanë se ne i nderojmë kulturën dhe fenë e tyre.”
Gjatë festës së komunitetit të mbajtur të martën, senatorja Trudeau — e cila është myslimanja e parë e zgjedhur në Legjislaturën e shtetit — iu drejtua të pranishmëve në Qendrën Islame të Tacoma-s:
“Dua të falënderoj të gjithë ata që mbështetën këtë ligj dhe ndihmuan që shteti ynë të respektojë të gjithë njerëzit e besimit dhe të drejtën e tyre kushtetuese për të praktikuar fenë e tyre lirshëm dhe në siguri,” tha ajo.
“Ky është një ligj i thjeshtë, por duke ngritur komunitetin mysliman dhe duke theksuar angazhimin e shtetit për lirinë fetare, Washington bëhet një vend më i pasur dhe më i gjallë. Ky është një shtet ku të gjithë janë të mirëpritur, të gjithë vlerësohen dhe të gjithë kanë vendin e tyre – pavarësisht fesë.”
Deputeti Salahuddin — i cili është i vetmi mysliman në Dhomën e Përfaqësuesve të shtetit — foli gjithashtu gjatë ceremonisë:
“Ky ligj nuk ka të bëjë vetëm me një datë në kalendar,” tha ai.
“Ka të bëjë me nxitjen e respektit, dukshmërisë dhe përfshirjes për një komunitet që shpesh është lënë në harresë.”
Vetë Guvernatori postoi në rrjetin "x" lajmin duke u shprehur: "I nderuar që nënshkrova ligjin tim të parë jashtë në komunitet. Mbrëmë, e bëmë Washingtonin shtetin e parë që njeh Fitër Bajramin dhe Kurban Bajramin si festa shtetërore. Jam mirënjohës për sponsorët senatoren Trudeau dhe deputetin Salahuddin për punën e tyre në këtë legjislacion të rëndësishëm."
Ligji i ri miratohet në një kohë kur myslimanët në SHBA përballen me rritje të diskriminimit. Në shtetin e Washingtonit, një raport nga viti 2024 tregoi se më shumë se 82% e myslimanëve raportuan se kanë qenë objekt i islamofobisë gjatë vitit të kaluar. / bota-islame.com
