Bilanci tragjik në Gaza: mbi 40.000 palestinezë të vrarë nga sulmet izraelite

Të paktën 40 palestinezë të tjerë janë vrarë në sulmet izraelite në Rripin e Gazës, duke e rritur numrin e të vdekurve që nga 7 tetori i kaluar në 40.005, sipas njoftimit të ministrisë së Shëndetësisë në Gaza.

Ministria raportoi gjithashtu se rreth 92.401 persona janë plagosur gjatë ofensivës 10-mujore.

"Forcat izraelite kanë vrarë 40 persona dhe kanë plagosur 107 të tjerë në tre 'masakra' të ndodhura në 24 orët e fundit," tha ministria.

"Shumë njerëz janë ende të bllokuar nën rrënoja dhe në rrugë, pasi shpëtimtarët nuk janë në gjendje t’i arrijnë," shtoi ajo.

Përkundër një rezolute të Këshillit të Sigurimit të OKB-së që kërkon një armëpushim të menjëhershëm, Izraeli është përballur me dënimin ndërkombëtar në mes të ofensivës brutale të vazhdueshme në Gaza, e cila ka nisur pas sulmit të 7 tetorit 2023 nga grupi palestinez Hamas.

Më shumë se 10 muaj pas fillimit të luftës, pjesë të mëdha të Gazës janë shndërruar në gërmadha mes një bllokade të rëndë të ushqimit, ujit të pastër dhe ilaçeve.

Izraeli është akuzuar për gjenocid në Gjykatën Ndërkombëtare të Drejtësisë (GjND), e cila e ka urdhëruar që të ndalojë menjëherë operacionin ushtarak në qytetin jugor të Rafahut, ku më shumë se një milion palestinezë kishin kërkuar strehim nga lufta përpara se të pushtohej më 6 maj.