Marrëveshje Izrael-Egjipt për eksport gazi me vlerë 35 miliardë dollarë

Kompania "NewMed", partnere në fushën gjigante të gazit Leviathan në Mesdhe, ka njoftuar nënshkrimin e një marrëveshjeje me Egjiptin për eksportin e 130 miliardë metrave kub gaz natyror deri në vitin 2040, me vlerë rreth 35 miliardë dollarë.

Kjo është marrëveshja më e madhe e eksportit të gazit që ka firmosur ndonjëherë Izraeli. Ajo pritet të hapë rrugën për zgjerimin e kapaciteteve të fushës Leviathan, duke siguruar furnizim për tregun izraelit deri në vitin 2064.

Kujtojmë se një marrëveshje më e vogël mes dy vendeve ishte arritur në vitin 2019, ndërsa që nga viti 2020 Egjipti dhe Jordania kanë qenë destinacionet kryesore të eksportit të gazit izraelit.