Në Kur’an dhe Traditën Profetike gjenden shembuj të panumërt që përbëjnë dëshmi shumë të forta për faktin se frymëzimi i Kur’anit është mbinjerëzor. Përmbledhtas, këtu po paraqesim një ngjarje që ndodhi në Angli, e rrëfyer nga Inayatullah Mashriqi:
“Ishte e diel,” shkruan ai, “viti 1909. Po binte shi i dendur. Kisha dalë për një punë kur pashë astronomin e famshëm të Universitetit të Kembrixhit, Sir James Jeans, me një Bibël në krah, duke shkuar për në kishë. Duke iu afruar, e përshëndeta, por ai nuk m’u përgjigj. Kur e përshëndeta përsëri, më shikoi dhe më pyeti: ‘Çfarë dëshiron?’ ‘Dy gjëra’, iu përgjigja. ‘Së pari, po bie shi me shumicë, por ju nuk e keni hapur çadrën.’ Sir James buzëqeshi për mungesën e tij të vëmendjes dhe hapi çadrën. ‘Së dyti,’ vazhdova, ‘dua të di çfarë bën një person i famës suaj universale duke shkuar të falet në kishë?’
Sir James heshti për pak kohë dhe pastaj, duke më shikuar, tha: ‘Eja sonte për çaj tek unë.’ Pasdite, shkova në shtëpinë e tij. Saktësisht në orën katër, Lady James erdhi dhe tha: ‘Sir James po ju pret.’ Hyra brenda, ku çaji ishte gati në tavolinë. Sir James ishte i zhytur në mendime. ‘Cila ishte pyetja juaj?’ më pyeti, dhe pa pritur përgjigjen, filloi një përshkrim frymëzues të krijimit të trupave qiellorë, rendit të jashtëzakonshëm që ata ndjekin, distancave të pabesueshme që përshkojnë dhe rregullsisë së pandërprerë që ruajnë. Ai përshkroi lëvizjet e tyre të ndërlikuara nëpër hapësirë, orbitat e tyre dhe tërheqjet reciproke, duke theksuar që ato kurrë nuk devijojnë nga rruga e zgjedhur, sado e ndërlikuar të jetë.
Fjalët e tij të gjalla mbi fuqinë dhe madhështinë e Zotit bënë që zemra ime të dridhej. Sa për të, flokët në kokë iu ngritën përpjetë. Sytë i shkëlqenin nga mahnitja dhe frika e Zotit, duart i dridheshin dhe zëri i dridhej. Ai tha: ‘Inayatullah Khan, kur shoh mrekullitë e krijimit të Zotit, e gjithë qenia ime dridhet nga madhështia e Tij. Kur shkoj në kishë, përkulem dhe them: “Zot, sa madhështor je Ti,” dhe jo vetëm buzët e mia, por çdo grimcë e trupit tim bashkohet për të shqiptuar këto fjalë. Nga lutja marr një paqe dhe gëzim të jashtëzakonshëm. Krahasuar me të tjerët, unë marr mijëra herë më shumë kënaqësi nga lutja ime. Tani më thuaj, Inayatullah Khan, a e kupton pse shkoj në kishë?’
Fjalët e Sir James Jeans më lanë pa fjalë,” tha Inayatullah Mashriqi. “Sir,” thashë unë, “fjalët tuaja frymëzuese kanë bërë një përshtypje të thellë tek unë. Më kujtojnë një varg të Kur’anit, që, nëse më lejoni, do të doja ta citoja.”
“Sigurisht,” tha Sir James. Atëherë Inayatullah recitoi këtë varg:
“Në male ka vija të ngjyrave të ndryshme: të kuqe, të bardha dhe shkëmbinj të zinj. Njerëzit, kafshët dhe bagëtitë gjithashtu kanë ngjyrat e tyre të ndryshme. Nga shërbëtorët e Tij, vetëm të diturit kanë frikë nga Zoti.”
(Kur’an 35:27-28)
“Çfarë ishte ajo?” tha Sir James me entuziazëm. “Vetëm ata që kanë dije i kanë frikë Zotit. E mrekullueshme! Sa e jashtëzakonshme! Mua më është dashur të studioj dhe të vëzhgoj për pesëdhjetë vite për ta kuptuar këtë të vërtetë. Kush ia mësoi këtë Muhamedit? A është vërtet kjo në Kur’an? Nëse po, mund ta regjistroni dëshminë time që Kur’ani është një Libër i frymëzuar. Muhamedi ishte analfabet. Ai nuk mund ta kishte mësuar këtë fakt të jashtëzakonshëm vetë. Duhet të ketë qenë Zoti që ia mësoi atij. E pabesueshme! Sa e jashtëzakonshme!”
Në fund të librit të tij Universi Misterioz, Sir James Jeans shkruan:
“Nuk mund të pretendojmë se kemi kapur më shumë se një shkëlqim shumë të zbehtë drite në rastin më të mirë; ndoshta ishte krejtësisht iluzor, sepse padyshim na është dashur të mundohemi shumë për të parë ndonjë gjë. Kështu që përfundimi ynë kryesor ndoshta nuk është që shkenca e sotme ka një shpallje për të bërë, por që shkenca duhet të heqë dorë nga shpalljet: lumi i dijes shpesh kthehet prapa në vetvete.” / Pjesë e shkëputur nga libri “GOD arises” / zell.al
