Zyrtarë turq dhe izraelitë kanë nisur të mërkurën bisedime teknike në Azerbajxhan për të shmangur përplasjet e paqëllimta në Siri, ku të dy shtetet kanë prezencë ushtarake. Burime nga Ministria e Jashtme turke dhe një burim politik izraelit konfirmuan takimin.
Sipas burimeve turke, këto bisedime shënojnë fillimin e përpjekjeve për krijimin e një kanali komunikimi që do të ndihmojë në parandalimin e incidenteve apo keqkuptimeve lidhur me operacionet ushtarake në rajon. “Përpjekjet do të vazhdojnë për të ngritur këtë mekanizëm”, tha një burim turk, pa dhënë detaje të mëtejshme.
Burimi izraelit tha se Izraeli ka bërë të qartë se çdo ndryshim në praninë e forcave të huaja në Siri – sidomos krijimi i bazave ushtarake turke në zonën e Palmirës – do të konsiderohet si “vijë e kuqe” dhe shkelje e rregullave.
Zyra e kryeministrit izraelit Benjamin Netanyahu konfirmoi se delegacioni izraelit, i kryesuar nga Këshilltari për Siguri Kombëtare Tzachi Hanegbi, ka zhvilluar takime me zyrtarë turq në Azerbajxhan, por nuk dha detaje mbi përmbajtjen e tyre.
Kjo iniciativë vjen një javë pasi Izraeli intensifikoi sulmet ajrore në Siri, si paralajmërim ndaj qeverisë së re në Damask. Izraeli ka akuzuar gjithashtu Turqinë për përpjekje për ta kthyer Sirinë në një protektorat turk.
Më herët, Reuters raportoi se ekipe ushtarake turke kishin inspektuar të paktën tre baza ajrore në Siri ku planifikonin vendosjen e forcave sipas një marrëveshjeje të re mbrojtëse me Damaskun – para se Izraeli të godiste këto baza me sulme ajrore.
Pavarësisht tensioneve diplomatike që nga sulmet izraelite në Gaza në vitin 2023, të dy vendet deklaruan javën e kaluar se nuk kërkojnë konfrontim të drejtpërdrejtë në Siri. Ministri i Jashtëm turk, Hakan Fidan, konfirmoi zhvillimin e bisedimeve teknike, duke theksuar se mekanizma të tillë janë të domosdoshëm për të shmangur keqkuptimet mes forcave të dy shteteve, ashtu siç ekzistojnë me SHBA-në dhe Rusinë.
